الأحد، 20 مايو 2018

تجربتي اثناء دراسة التصميم الداخلي interior design as a major


اولاً

التصميم الداخلي مو عمل فني فقط
التصميم الداخلي مو تخصص سهل ويسير 
التصميم الداخلي مو بس اختيار بلاط وستاير واثاث

 طيب ايش هو التصميم الداخلي؟


علمياً هذا تعريف التصميم الداخلي بس ايش يعني هذا الكلام؟
التصميم الداخلي هو دراسة المساحات واخراجها بطريقة عملية تناسب نمط حياة , حالة و وضع المستفيد.
بالتصميم الداخلي ندرس الحركة البشريه والمقاسات اللي تخلي الفرد يؤدي عمله بشكل افضل مثلاً 
ارتفاع طاولة المكتب غير ارتفاع البار بالمطبخ غير ارتفاع الطاولات الجانبيه او طاولة القهوة. 
لأن النشاط مختلف بكل طاولة هنا. بالتصميم الداخلي ندرس كورس كامل عن السلوك البشري عشان نعرف كيف نتعامل معه. مثلاً  التصميم للشخص المصاب بمرض توحد قواعده تختلف عن التصميم للشخص المسن او الاطفال او الاشخاص اللي عندهم فرط حركة .... الخ 

بختصار التصميم  الداخلي عباره عن كيف راح يسهل العمل مو كيف راح يكون شكله لأن بالنهايه احنا نصمم بناء على العمل مو 
بناء على مفهوم او فكرة. " الترجمه الحرفية مو ضابطه معي لذالك "

we design  according to function not according to concept because 
interior design is about how it works not how it looks  

طيب بس ايش بالضبط يسوي؟ ايش نوع المخططات اللي يشتغل عليها المصمم الداخلي؟

1- مخطط الاعمال  الجدارية: يتم فيه تقسيم المساحات وصنع الفراغات (الغرف) 
يحدد فيها نوع الحاجز هل راح يكون جبس بورد, اسمنت بورد , زجاج, قواطع خشبية ... الخ 
كل اعمال البناء الداخلية تكون بهذا المخطط
 
2- مخطط السقف: الذي يشمل مواقع الاضاءات , ارتفاع الاسقف , شغل الجبس وديكورات السقف ,مواقع مرشات 
المياه الخاصة بالحريق وانذار الحريق , البروجكتر.... المخطط يشمل كل العناصر اللي تكون بالسقف 

3- مخطط الارضيات :اللي يشمل خامة الارضيات ومقاستها  ومواقعها
 
4- مخطط القواطع الكهربائية والتمديدات الكهربائية 
يتم تحديد نقاط الكهرباء فالمساحة بما يتناسب مع التوزيع الكلي للمساحة 
فيكون فيه تحديد مواقع الافياش , الswitch حق الاضاءة
فيش التلفزيون والهاتف الثابت ....

5- مخطط توزيع الاثاث : اللي يشمل مقاسات الاثاث , مواقعها , ويوضح مسارات الحركة بالمساحة مع 
وجود الاثاث بحيث ما تكون عائق بالطريق

6- الواجهات الجدارية : اللي تمثل جدران المساحة في حال اشتملت على اعمال جبسية , قواطع خشبية , اضاءات
بشكل عام كل العناصر الجدارية 

7- اظهار ثلاثي ابعاد للمساحة بحيث يسهل فهم التصميم للمقاولين , العمال والعميل 
بعد الانتهاء من انشاء كافة المخططات ينتج المصمم الداخلي تصور ثلاثي ابعاد للمساحة كيف ممكن تكون 


 لأني اشارك صور كثير في الانستغرام عن دراستي توصلني  بشكل شبه دوري اسئله عن التخصص ابرزها 

هل لازم اعرف ارسم ؟ 
هل هو صعب ؟
ينفع اتعلم تصميم داخلي من غير ما اتخصص؟
التخصص له مستقبل؟
ايش تدرسين بالجامعه عنه ؟

بحاول اجاوب الاسئله الاكثر تداولاً وان كان في اسئله ما جاوبت عليها  اكتبوها بالتعليقات تحت ويسعدني افيدكم 
بالاشياء اللي اعرفها .

نبدأ بالسؤال الاول وش قعد تدرسين بالجامعه ؟

تخرجت حديثاً من جامعة الامير محمد بن فهد بمدينة الظهران بالمنطقة الشرقيه 
غير مواد التخصص ندرس مواد عامة زي الفيزياء , الكمياء ,علم النفس ,تاريخ, جبر ورياضيات .... الخ
لكن بركز على مواد التخصص بس 


اول ترم بالجامعه اسميه الترم التطفيشي 
مره كنت احسه شي ما يمت بالتصميم بجهة وكان عسر مره 
الغرض من ذلك يختبرون صبرك عالتخصص
 نأخذ فيه مادتين تصميم داخلي والباقي مواد عامه 

المادة الاولى intro to interior design 
 هذي المادة نظرية تتعرفين فيها على التخصص بشكل موجز 

- ابرز الستايلات بالتصميم وتاريخها 
- بعض اشكال الاضاءه ووين تستخدم 
- بعض المواد ووين تستخدم وايش ابرز سماتها 
- مهام المصمم وايش السمات اللي المفروض يتسم فيها 

بختصار تتعلمين لمحه تاريخيه عن التصميم وابرز المؤثرين فيه ومعلومات بسيطه عن التصميم عشان 
تشتغلين على بروجكت صغير للكورس 
كان الكورس يعتمد على اختبارات دوريه 

المادة الثانيه interior design  one 

 المادة تطبيقية وتأخذك من الصفر تتعلمين فيها 

- خط المعمارين اللي هو هذا 


وكثير نشاطات بسيطة بس ترفع الضغط غرضها اختبار صبرك ودقتك 
وتمرين يدك على الخطوط الدقيقة بحيث رسمتك تصير كأنها طباعه


المشروع النهائي لهذي الماده كان انك تصممين استديو لشخصين 
مستوحى من مدينة ما بختيار ستايل من الستايلات اللي درستيهم في المادة النظرية 

اخترت نيويورك والستايل الصناعي 
وهذي كانت لوحتي لحد يسئلني ليه قررت انه هذي امثل طريقة لتصوير اللوحة 

ما يستفاد او ترم كانت تهيئة وتدريب عالدقه في الرسم وتتعلمين انواع الاظهار في رسم المخططات ابرز المعلومات عن المواد 
المصممين الاكثر تأثير و ختاما تطفيشك بموضوع الدقه.

الترم الثاني تبدأ الدراسة الممتعه للتصميم الداخلي 

اخذت فيها برضو كورسين 

الاول freehand sketching 

امتع المواد اللي تاخذينها  فكرته كيف تترجمين تصاميمك عالورق برسم
تدرسين فيه الرسم بمنظور واحد 
الرسم بمنظورين 
استخدام الالوان المختلفه وكيف تخدمك عشان تبرز السكتش بشكل واقعي اكثر 
وهذي يعض الاسايمنتس اللي طبقتها للمادة 
فعلأ استمتعت بكل لحظة فيها بعد قساوة الترم الاول 







 الثاني interior design two  


- هنا تبدأين تدرسين حركة الانسان والمقاسات اللي يحتاجها بكل مساحه عشان تكون عملية 
في كتابين درسناهم ونستخدمهم كمرجع للقياس





بختصار بتتعلمين القياسات اللي يحتاجها الشخص في كل المساحات 
المكتب, المطبخ, غرفة النوم, دورات المياه, غرفة الملابس .....الخ 
ايضا المساحات اللي يحتاجونها الاشخاص ذوي الاحتياجات الخاصة للحركة 
كتابين كاملين شاملين كل القياسات اللي تحتاجينهم قالت لي الامنستركتر بداية الترم لازم تحفظين الكتاب وارتعت 
مع الممارسه احس صار شي منطقي وتقريبي حسيت يعني اعرف انه ارتفاه المكتب اللي قعد اكتب من حالياً 70 سم لانه طاول عمل 
اقل من 70 بيكون نازل جداً وبيأذي ظهري وارفع منها بيزعج عيني . كثير من زميلاتي اتفقوا بأن موضوع المقاسات صار بديهي مع الوقت. فلا تخافي لا تخافي 



ايضا تدرسين انواع النوافذ والابواب والجدران المختلفه وكيف ترسمينها بالمخططات وايش الدلالة او التأثير لكل 
مادة تأثير القزاز غير الاسمنت غير الخشب .....الخ 

المشروع النهائي لهذي المادة كان تصميم منزل لعائلة من خمس افراد ام واب ولدين وبنت 
بستايل من اختيارك بمساحات حركة صحيحه وعملية  بأنواع نوافذ وابواب مختلفه على حسب احتياج المساحة 
واختاري كونسبت فكرة طبقي على اساسها الستايل 
اخترت الصدف والارت ديكو كستايل 
وهذا كان مشروعي


اللوحه الاولى concpet bored 

تشرحين فيها كيف تقسيم المساحه بناء على مستوى الخصوصيه حقها , العلاقه بين الغرف, جدول للأبواب والنوافذ , سبب استخدامك للستايل وكيف راح تطبقينه والدائرة اللونية اللي اخترتيها 


اللوحة الثانيه Top plan 


ظاهره فيه كل التفاصيل الارضيه الاثاث من رؤيه علوية 

اللوحة الثالثه واجهات رسم للتصميم من غير منظور او ابعاد 

صور اوضح 


بختصار اول سنة اعتمدت عالتأسيس الترم الاول يدربك عالدقه ويعرفك على عالم التصميم 
والترم الثاني يعلمك عالمقاسات اللي الانسان يحتاجها وكيف تترجمين افكارك على ورق ويثريك ذوقياً.


 السنه الثانيه  

الترم الاول 

درست 3 مواد تصميم 

الاول  Digital design 

الكورس يهتم بتعليمك استخدام برامج التصميم والهندسة تعلمنا فيها استخدتم برنامج الاوتوكاد 
والفتوشوب لتحسين التصاميم




الثانيه Behaviour and environmental psychology of design
  


يارب اسمها صح 
تدرسين سلوك الكائن البشري 
الاطفال, كبار السن , وركزنا كثير على دراسة الاشخاص المصابين بتوحد 
وكيف تخلين المساحة تفرض سلوك معين كيف بالمطارات تخلين الشخص ما يحس بالمساحة اللي يقطعها 
او بالمتاحف تخلين الشخص يمشي بألية معينه بختصار المادة تساعدك تفهمين السلوك البشري وكيف تتعاملين معه اثناء تصميم المساحة المادة نظريف وفلسفية بحته بس كان ممتع دراستها خصوصا ان الانستركتر حقتنا كانت تعطينا اشخاص وقضايا حقيقين وانتي تبحثين اكثر عن الموضوع اللي يطفش بهذي المادة كثرة اختباراتها بس محتواها جداً مهم وممتع ومفيد معرف ايش اقول 
عشان اعطيها حقها.

الثالثه Interior design three

الكورس هنا كورس كامل تدرسين فيه تصميم المناطق السكنيه عندك فيلا من دورين 
تعطيك الانستركتر سيناريو لعائله و مخطط فاضي فيه بس الجدران الخارجية للبيت وأعمدة الأساس و انتي بعد ما سمعتي اهتمامات العائله والسناريو حقهم وفهمتي احتياجاتهم كيف راح تقسمي البيت وتصممينها 
الكورس كان كله يتكلم عن تصميم المنازل طول الترم تشتغلين على بروجكت واحد وموضوع واحد راح يتم تقييم عملك 
اكثر من مره طول الترم كنا نشتغل على الفيلا كيف راح تصممينها بشكل عملي وانيق ومقنع 
التصميم متكامل يشمل تصميم الارضيه السقف الاثاث الجدران كل شي بيكون ظاهر بهذي المرحله
هذا كان المشروع حقي 
منزل لعائله من 6 اشخاص ام واب عندهم 3 اطفال بنتين و ولد والجد فنان ساكن معهم
اخترت الستايل الكلاسيك الحديث المتأثر بالقرن الثامن عشر واليونان القديمه










باقي مخططات السقف بس حسيت مراح تكون مفهومة اذا ما كانت فوق الخرايط فما لها داعي وضرورة .

السنة الثالثة والرابعه  تحول كل شي لبرامج الاظهار الالكترونية
وتوقف الرسم اليدوي عاد في الاختبارات النصف نهائية
فصارت المخططات كلها اوتوكاد والاظهار فوتوشوب وثري دي ماكس

درسنا مواد عديدة تخص التخصص
زي
  اشتراطات البناء العالمية والمحلية 
الاضاءات 
الاستدامة 
تاريخ العمارة والتصميم
الممارسة المحترفة للمهنة 
تصميم المشاريع التجارية 
تصميم الفنادق 
تصميم المكاتب 
تصميم المستشفيات 


هذي الخطة الاكاديمية للجامعة ممكن توضح المواد الدراسية بشكل افضل 


ومثل ما قلت كان تخطيط المخططات يتم في برنامج الاوتوكاد 
واظهار التصاميم في برنامج ثري دي ماكس 
ممكن تشوفون عينات 3D 
على حساب الاعمال هنا 





هل جاوب على سؤال وش تدرسين بشكل كافي ؟


السؤال الثاني هل هو صعب ؟ 

 صراحه متعب اكثر من صعب اصعب مرحلة مرحلة تقسيم المخطط لأنها كأنك تحلين حزورة كيف ممكن تقسمينها بشكل صح  من غير ما تخسرين مساحة او تتعارض الخصوصيه حقت الغرف. اذا قسمتي المخطط نص الازمة انحلت والمخطط ينقسم وفق عملية رياضيه تحسبين فيها المساحة الاقل للغرفة عشان تكون عملية بعد أخذ اعتبار الحركة والاثاث. متعب لأنه يأخذ وقت التقسيم يأخذ وقت البحث ياخذ وقت الرسم يأخذ وقت وجهد عشان الدقه تكون بمستوى عالي بس ببداية دراستك بيكون رسم بعدها بيكون كل شي ديجتل بس حتى التصميم الديجتل يأخذ وقت فمتعب التخصص يعني عادي تداومين مواصله وشكلك مريع ومرعب وكائن شبه حي و انسي موضوع ان نهاية الاسبوع يكون لك لا يكون للتخصص.بس بنظري يستحق كل التعب واحبه. برضو كل منشئة تصميمها وتخطيطها يختلف عن المنشئة الثانية.. تصميم وتخطيط  الفندق يختلف عن تصميم الشركات ,المنازل ,المستشفيات , تصميم المدارس, المطارات ... الخ كل منشئة لها احتياجات مختلفة ,اشتراطات بناء مختلفة , خامات واضاءات معينة وتحتاج بحث خاص فيها قبل مباشرة العمل 


يمدي اتعلمه من غير تخصص؟

اذا تعلمتي مقاسات الحركة الصحيحة وقعد تصميمين لشخص سليم ما يعاني اي مشاكل وعندك القدره انك تحلين المشاكل اللي موجود بالمساحة طبعاً يمديك من رأيي الشخصي اذا ثقفتي نفسك بهذا التخصص يسهل عليك تصميم مساحتك الشخصيه فقط. والكتاب اللي حطيته فوق نيفورت بيساعدك تتعلمين مقاسات الحركة بكل غرفة وفيه منه نسخه بي دي اف اونلاين بس اكيد المتخصص غير لانه عنده خبرة اوسع ودراسة 4-5 سنين يعرف يتواصل بشكل افضل مع الفريق الهندسي وعنده فكرة عن الافكار اللي يمكن انها تتنفذ , انواع الاضاءات والخامات وعلم توزيع المساحة .. بختصار اشوف انه يمديك تثقفين نفسك بالمجال لما تشتغين على مساحتك الخاصة بس ما يمديك تمارسين المهنة من شغف ومحبة فقط هو بنهاية اليوم علم مومسئلة ذوق حلو بس 


هل لازم اعرف ارسم ؟

هممم بالنسبه لي احس الرسم مهارة تكتسب ومو موهبة مع التدريب بيتحسن رسمك وقدرتك على الرسم تعطيك امتياز عن الاشخاص اللي ما يعرفون يرسمون لانك قاردة تترجمين افكارك بشكل افضل منهم, في كثير معي زميلات مالهم تجارب سابقه بالرسم قعد اشوفهم ماشين بالتخصص بس تفرق درجات المتمكنين بالرسم عن غيرهم فتدربي افضل.. و اول سنة ونص كانت جميع المخططات يدوية الرسم بعدها انتقلنا للجانب التقني وصرنا نشتغل على برامج اظهار وتخطيط

هل التخصص له مستقبل ؟

صعب الجواب عن السؤال لأن الارزاق بيد الله. فرص عمل التصميم الداخلي عديده
ممكن تقديم استشارات هندسية, العمل بمكتب هندسي, تكملين ماستر وتشتغلين معيده بكلية هندسة, العمل في محلات الاثاث كمصممة داخليه او تصميم الاثاث أو تشتغلين لصالح نفسك . هذا اللي يحضرني حالياً

ايش الفرق بين تصميم الديكور و هندسة التصميم الداخلي؟

تصميم الديكور على حد علمي  يكون الشخص معني بالتشطيبات اللي تخص المساحة ما يتدخل بالحواجز الجدارية 
وتقسيم المساحة
في جامعات قسم التصميم الداخلي حقها يقع تحت كلية التصاميم وتكون الخطة الاكاديمية 
مركزة على الجانب الفني من عملية التصميم وتتخرجين ببكالوريس فني 
bachelor of arts in interior design 
وفي جامعات تضع تخصص التصميم الدخلي تحت كلية الهندسة او العمارة 
بحيث الخطة الاكاديمية تتضمن مواد تقنية ومعمارية اكثر 
وتتخرجين بكالوريس علمي 
bachelor of science in interior design 

التسمية العلمية للتخصص هنا المفروض تكون عمارة داخلية مو هندسة تصميم داخلي
لان المهندس معني بتشغيل المبنى مو تخطيطة 
زي مهندس انشائي , كهرباء , مياه... الخ 
والمعماري هو المعني بتخطيط المخططات وتوزيع المساحات 

بس في حالة زي حالتي وثيقتي تقول اني خريجة هندسة تصميم داخلي 
لان تخصصي يقع تحت كلية الهندسة 

هل التخصص ينفع للأولاد؟

يضحك السؤال واجده مثير للسخرية 
هل العمارة تنفع للاولاد ؟ ليه اذا اضفنا كلمية تصميم تأنث التخصص؟
التخصص علمي بحت وختامة العملية يبدأ الجانب الفني 
خل نوقف من انتشار الافكار النمطية وتأنيث وتأذكير التخصصات لأن
لكل مجتهد نصيب وكل احد يسعى ويدرس يمدية يقوم بالعمل بكفاءة عالية 
الجنس ماهو معيار للجودة والكفاءة 


اظن انه انتهيت اذا كان عندكم اي اسئله ما جاوبت عليها  ارسلوها في حساب من حساباتي بالسوشيال ميديا 
ويسرني ويسعدني افيدكم @assielsalam

ممكن تطلون على الهايلايت في الانستقرام بأسم اسئله عن التخصص 
احفظ فيه العادة الاسئلة اللي توصلني

اعتذر عن الاخطاء الاملائية ان وجدت وعن الاطالة مقدماً وحظاً موفقاً جميعاً

هناك 12 تعليقًا:

  1. ان شاء الله ناويه ادخله
    انا الان ثالث ثانوي باقي لي ترم و اتخرج
    يارب توفيقك
    :(

    ردحذف
  2. مكتب التصميم الداخلي , أهلا بك إلى مكتب التصميم الداخلي, احصل على ال أفضل تصميم داخلي الخدمات في الرياض. نحن هي ال المحترفين مصمم ديكور داخلي و مهندس تصميم داخلي في الرياض.

    ردحذف
  3. الله يعطيك العافية ويوفقك تستفدت واستمتهت بطريقتك الجميلة وأسلوبك السلس وشاكرة لك ومقدرة وإن شاء الله يحسب لك علم نافع تؤجرين عليه خير الجزاء .

    ردحذف
  4. يعطيك العافيه, استفدت من موضوعك كثير ,شرحك للتخصص عرفني بعض الامور اللي كنت اجهلها في هذا المجال ,, شكراً لك وارجو لك التوفيق .

    ردحذف
  5. السلام عليكم
    ممكن أسالك إذا بغيت ادرس التصميم الداخلي لازم اكون اعرف أتكلم اللغة الإنجليزية ؟؟

    ردحذف
    الردود
    1. لا مش ضروري الكلمات والعبارات الخاصة بهذا التخصص تكتسبها تلقائيا اثناء دراستك له، بالاضافة الى انه يمكنك ترجمة اي شيء تريده من خلال المترجمات الكثيرة.

      حذف
  6. انا سؤالي اخت اسيل هل يستحق هذا التخصص التعب والعناء، بمعنى آخر هل سأجد بعد دراستي له فرص عمل ام اني سأعمل بشيء آخر بعد التخرج.

    ردحذف
  7. السلام عليكم يسعدك ربي جد كلامك ملهم ومحفز ابسألك أنا بدرس تصميم داخلي 3d max دورات يعني ٩ شهور او دبلوم مكثف ينفعني أتوظف

    ردحذف
  8. مشكور بيان المجهود الى بذلتيه جزاءك الله خيرا 💙💙💙

    ردحذف
  9. اخر سنة , و ان شاء الله ادخله ☻

    ردحذف